البروفسير مجدي يعقوب وصمام قلب جديد

إنجاز طبي جديد وعظيم ببصمة جراح القلب المصري البروفسيور د."مجدي يعقوب" اللي قاد فريق بحثي طبي لإنجاز جديد في مجال زراعة الصمامات في القلب.. إيه الحكاية؟.. الموضوع إن د."مجدي" وفريقه ابتكروا صمامات جديدة للقلب مصنوعة من الألياف بتتزرع في الجسم وبتتكامل مع خلايا الجسم وبمرور الوقت بتدوب وبتسيب مكانها صمام حي مكون بالكامل من أنسجة المريض نفسه.. الصمام الجديد هينهي للأبد عمليات استبدال صمامات القلب اللي بتتعمل حالياً، وهتنقذ حياة آلاف الأطفال اللي بيتولدوا وهما عندهم مشاكل في القلب وبيضطروا يزرعوا ليهم أكتر من صمام على فترات لحد ما يوصلوا لمرحلة البلوغ.. لكن دلوقتي الصمام الجديد هيتزرع مرة واحد وهيكبر مع الطفل واحدة واحدة.. الصمامات المأخوذة من الحيوانات بيبقى عمرها الافتراضي بالكتير 10 سنين ده غير إن في حالات كتير جهاز المناعة في الجسم بيرفضها لكن في الصمامات الجديدة الوضع مختلف.. هي صمامات قلب طبيعية مصنوعة من الألياف بتنمو بشكل طبيعي في الجسم.. د."مجدي يعقوب" عالم مصري أصيل وعظيم ومصمم يفضل للنهاية بيدور ويتعلم ويذاكر عشان ينقذ حياة الناس.. نموذج مصري مُلهم وعبقري.. بنا يديله الصحة ويبارك فيه. #بالعامية_المصرية