سد النهضة والبراكين والزلازل
????**الزلازل وسد اثيوبيا**
♦️ايه التقرير الامريكاني دا عن السد الاثيوبي؟
دا تقرير صادر عن الاكاديمية الوطنية للعلوم الامريكية.. الجهة الأمريكية الرسمية اللى قالت للاحباش أواخر خمسينات القرن العشرين ابدأوا ف السد ع بركة الله المكان زي الفل والمشروع زي الفل..
الاكاديمية الوطنية للعلوم الامريكية بتقول ايه سنة 2024 ؟
بتقول السد اتعمل في مكان غلط من الناحية الجيولوجية، بحيرة السد بتسرب المية.. 19.8 مليار متر مكعب من مية السد اتسربت في اقل من 3 سنين ..
19.8 مليار متر مكعب من بين 43 مليار متر تم تخزينهم ف اول تلات سنوات لمحاولة الملء..
بتقول لك انه التسريب وعوامل أخرى متعلقة بالسد هي السبب في التغير الجولوجي اللى حصل ل هضبة الحبشة في الكام سنة الأخيرة .. وان السد هو فعلا السبب في دخول اثيوبيا مستوي جديد من حزام الزلازل والنشاط البركاني وحط تحت البركانية دي مئة خط..
الامريكان بيتكلموا عن الدور الذي تلعبه المياه المتسربة في تحفيز النشاط الزلزالي .. حوالي 20 مليار متر مكعب من المية تدفقت لطبقات والفوالق الجيولوجية لهضبة اثيوبيا كلها..
يعني كلام الدكتور عباس شراقي طلع صح .. عشان طلع علينا شوية هواة من فترة قالوا لك كلام غير معقول وهو هيفهم احسن من الامريكان اللى قالوا للحبشة في الخمسينات ابني السد هنا وهتاكل الشهد بعد كدا !
التقرير صدر ف 25 صفحة .. بيوضح ان الامريكان بيراقبوا السد ع مدار 24 ساعة عبر القمر الصناعي "جريس" والقمر الصناعي "جريس فولو- أون".. دا مسرح عمليات يا جماعة مش مجرد سد ولا نهر .. ومفهوم المستهدف مين من اللحظة الاولي..
التقرير بيتكلم انه تم رصد مستنقعات جديدة في السهول شرق وادي النيل، واللي زادت من 109 كيلومترات مربعة في عام 2020 إلى 328 كيلومترا مربعا في عام 2022، ويتزامن هذا التوسع في الأراضي الرطبة مع أنماط هطول الأمطار المتناقصة، مما يشير إلى أن المياه الجوفية من خزان السد تساهم في هذه التغيرات البيئية.
السد دمر البيئة في اثيوبيا مش الأرض وبس .. التقرير بيقول ان يقع سد النهضة الإثيوبي في منطقة جبلية تتكون بشكل رئيسي من صخور الأساس البركانية، واللي تشمل بشكل أساسي البازلت الذي يتميز بنفاذية عالية نسبيا تساهم في تسرب المياه.
المنطقة كمان تحتوي على نظام معقد من الشقوق والفوالق الجيولوجية اللى ليها تأثير رئيسي وحاسم على النشاط البركاني وحزام الزلازل..
ايه دا ؟ دا سد ولا قنبلة نووية بتتزرع ع نار هادية ف قلب الحبشة ؟ والاثيوبيين ساكتين على الكلام دا ازاى؟
المقلق ف الموضوع ان التقرير الأمريكي بيقول ان السودان بدأ يوصل لطبقاته التسريب دا .. وانه السودان داخل ع ازمة حزام زلازل وانشطة بركانية لو فضل التسريب شغال بالشكل دا ..
مفيش خطر على مصر او النيل الأزرق لو حصل ف اثيوبيا اى حاجة .. كدا كدا المياه بتنزل ع هضبة الحبشة وهتكمل ل السودان وتلتقي ب النيل الأبيض ف الخرطوم وتكمل ف مسيرتها المقدسة الازلية ل مصر .. اللى هيتغربل زلازل وبراكين هو شعب اثيوبيا الفقير المظلوم ع ايد أمثال الديكتاتور الحبشي ابي احمد
خالفت كل التحذيرات ورحت عملت سد هائل الحجم عشان تحجز أطنان من المياه ورا السد وتبني بحيرة كل دا ف مكان وارض وتربة كل العقلاء ف مصر وغير مصر قالوا لك مش صالحة
دا علم اسمه جولوجيا مش عند ولا هبد
طيب اخر كلام دا كلام مهم ؟
ايوا .. عشان الاكاديمية الوطنية للعلوم ف أمريكا مش كيان عادي.. دا اكبر مجلس علمي بيقدم تقارير للبيت الأبيض وكل وكالات ووزارات الحكومة الامريكية في مجالات العلوم والهندسة والطب.. تأسست سنة 1863 وقت ما كان فيه حرب أهلية ف أمريكا يعني مؤسسة فيدرالية أمريكية بقالها 160 سنة وحاليا بتضم اكتر من 200 عالم فائز بجائزة نوبل ف تخصصات مختلفة
انا بس عايز افكر حضراتكم انه من 2011 كنت بتكلم في عدد من المحاور بخصوص السد:
اولاً .. السد يقع في منطقة غير مستقرة جولوجياً، تربة غير صالحة لبناء السد، وحصل
ثانياً.. السد آيل للسقوط والاقمار الصناعية رصدت تشققت في جسم السد.. وحصل
ثالثاً.. اغلب منشآت السد غارقة تحت مياه النيل الأزرق وغير قادرة على أداء دورها، وحصل
رابعاً .. توربينات توليد الكهرباء دى مجرد شو ومش شغالة وغير قادرة أصلا على توليد الكهرباء وكل منشآت سد النهضة حتى الان غير قادرة على توليد الكهرباء والاهم ان اثيوبيا أصلا مفيهاش شبكة كهرباء لا حديثة ولا قديمة قادرة على توزيع الكهرباء المزعومة من سد النهضة على الولايات والاقاليم الاثيوبية وبالتالي كل الكلام دا كان مجرد حرب أعصاب ومعنويات على الشعب المصري ومحاولة توريط القيادة المصرية في قرارات انفعالية غير مدروسة.
خامساً.. بحيرة السد غير قادرة على احتجاز المياة والسد الأوسط غير قادر على احتجاز المياه .. وحصل ..
واتضح انه مش قادر ع احتجاز المياه لدرجة انه تم فتح مفيض السد وبس ولكن كمان غير قادر على الاحتفاظ بالمياه اللى ادعوا انه تم حجزها وشفنا تسريب بيغرق اثيوبيا في مستنقع من البراكين والزلازل المستقبلية.
سادساً .. مفيش اى عقود او مناقصات جرت بين اثيوبيا وجيرانها ف شرق افريقيا ولا حتى ف عموم افريقيا عشان نقول اكبر مشروع للطاقة الكهرومائية او هيحول اثيوبيا لمركز إقليمي للكهرباء ..كل افريقيا عمالة تتفرج ع المسرحية الرخيصة الهابطة والخاسر الوحيد هو الشعب الاثيوبي الضحية اللى تم التغرير به انه النهضة فاضل لها كام ساعة وتبقا جاهزة واثيوبيا تنطلق ل العالمية ع ايد ابي احمد.. اثيوبيا لا هتصدر كهربا ولا هتقدر تبقا غول طاقة ف افريقيا ولا فيه تنمية ونهضة طول ما نخبة اديس ابابا بتنفذ مشاريع الغرب ضد مصر، النهضة والتنمية لازم تبقا مشروع وطني مش مشاريع مستوردة ودا اللى بنطمع فيه ف اثيوبيا ل صالح الشعب الاثيوبي قبل اى حاجة تانية
سابعاً .. ما يسمى بالملء الأول والتاني والتالت والرابع والخامس كلها جولات فاشلة، الملء الأول فشل ولما يفشل المفروض محاولة الملء اللى بعده تبقا محاولة استكمال الملء الأول مش شغال عداد ارقام ورا بعض كأنك ف مزاد بس برضو دا مفهوم أسبابه .. كل رقم جديد كان حرب أعصاب جديدة غربية وصهيونية على الشعب المصري، وللأسف فيه اشكال بتتحسب علينا نخب ومعارضة كانت مشاركة بالأمر من الغرب ف اللعبة دي وف تأليب الشعب وتسخينه عشان يدفع القيادة السياسية والعسكرية لأعمال عنترية حربية ضد اثيوبيا بس غاب على كل الاشكال دي ان مصر دولة مؤسسات مش كوكي بارك عشان الزبون يسخن ف القيادة تسخن.
مصر لا تدار من سوشيال ميديا ولا من الشارع ولكن دولة مؤسسات قادرة على انتاج تقدير موقف مهني ومتزن وصلنا لسياسة مصرية راقية ومتزنة والاهم من الشكل هو المضمون احنا فاهمين كويس قوي تفاصيل اللعبة وف نفس الوقت بنتلاعب بهم وفاهمين ان عامل الوقت لصالح القاهرة مش اديس ابابا
دا سد ذو تاريخ صلاحية قصير الاجل .. غرضه كان يبقا فخ ومصيدة .. مش معني كدا انه مصر لو ضربت هتخسر .. ساعات القدرة بتبقا ف حد ذاتها هي الفخ .. انت هتروح تضرب وتغربل وتدشمل وتسوي السد بالأرض.. بس وقتها كان هيطلع لك عشرات التقارير زي التقرير الأمريكي دا .. يقولك السد مكنش خطر على مصر بس مصر استخدمت القوة العسكرية في غير موضعها وقضت على مشروع مدني ومحاولة تنموية لدولة افريقية وتضيع شعبية مصر في القارة الافريقية ل 100 سنة قدام ومعاها حزمة عقوبات دولية على مصر زي ما كانوا محضرين عقوبات ل روسيا لما راحت تضرب ف أوكرانيا عشان تحافظ ع امنها القومي اللى كان وقتها مستباح انطلاقا من أراضي أوكرانيا
ف القدرة مش انك تضرب ولكن ساعات القدرة الحقيقية انك متضربش وتعرف امتا تضرب من عدمه وهل الموضوع يستحق الضرب من عدمه وانك تفهم ان سلاحك مش للاستخدام وبس ولكن ف العلوم العسكرية فيه حاجة اسمها سلاح ردع انت معاك سلاح مخلي نص المنطقة مش بتفتح بقها معاك والنص التاني ثبتناه ف معارك حصلت بالفعل ف ال 100 سنة الأخيرة سواء الخط الأحمر المصري ف ليبيا ولا انتصار أكتوبر 1973 ولا يوم ما مصر انتصرت للعراق ف حربه مع ايران واستردت البصرة من الاحتلال الإيراني ف ثمانينات القرن العشرين وغيره من الانتصارات المصرية العلنية والمباشرة او غير المباشرة..
مصر لن تنزلق لاى معارك فرعية وهتفضل عينها ع المعركة الرئيسية ولعبة استدراج مصر لحرب اليمن قبل جولة يونيو 1967 مش هتكرر تاني..
ويتضح ان كل ما كتبه صاحب تلك السطور كان صح مفيش كلمة كانت غلط ف الملف الاثيوبي سواء سد الضحك الاثيوبي ولا الشأن الداخلي الاثيوبي اللى شرحنا لحضراتكم الانقسامات العرقية والقبائلية الاثيوبية بمنتهي الدقة وعرضنا تفاصيل الحرب الاهلية التانية وتمرد تيجاري واورومو وحاليا امهرة وميلشيا فانو بكل دقة وموضوعية وحيادية بدون تهوين او تهويل.. ودا عشان حاجة واحدة بس .. عمرك ما هتنتصر بشعب مغيب او عنده وعى زائف او انصاف مثقفين .. لازم يتم رفع منسوب الوعي ف العقول والنفوس عشان نبقا ع نفس مستوي المعارك الجارية والعدوان النفسي والثقافي والمعنوي والرقمي اللى بتتعرض له الشخصية المصرية المعاصرة على مدار 24 ساعة عبر تطبيقات وسائل التواصل الاجتماعي معقل الثورة الصناعية الرابعة
اللى يقولك الكلام دا مفيد للحبشة، واصل ولاد الحبشة بياخدوا الكلام دا في اعلامهم ويسوقوه باعتبار السد صحي ومفيد .. انا مش هسمح لليمة التانية تحط لي جدول اعمالي..
ختاماً فيما يتعلق بسد الضحك الاثيوبي.. خير ما يقال عنه دائما هو ما قاله الرئيس عبد الفتاح السيسي عن السد يوم الخميس 15 يوليو 2021 ..
لا يليق بنا ان نقلق.
