الاستيراد والتصدير ام الاكتفاء الذاتي
امريكا بتستورد كل سنه بعشرات المليارات من الدولارات ، سيارات !
بعض التقديرات تصل 150 مليار دولار !!
بعض السيارات اللى امريكا بتستوردها ، بتكون سيارات لشركات امريكيه ، بس مصانعها فى المكسيك او كندا او الصين مثلا ! زى فورد وشيفروليه ودودج
وبعضها لا ، زى تويوتا و نيسان وهوندا و هيونداى و جيلى و مرسيدس..الخ ، يابانى و كورى وصينى و اوروبى !!
طب ليه امريكا مبتعملش اكتفاء ذاتى من السيارات ؟!
لان ده مستحيل تقريبا الا لو قفلت الاستيراد
ولو قفلت الاستيراد ، الدول التانيه هتقفل فى المقابل استيراد المنتجات الامريكيه ، يعنى اوروبا ساعتها هتقفل استيراد الامريكى لو امريكا قفلت استيراد الاوروبى !! ومشاكل تانيه بقى !!
فكون امريكا بتستورد عربيات ، لا يعنى انها مبتنتجش ، لكنه يعنى ان مينفعش توقف استيراد
برضه مصر بتنتج حاجات كتير وتصدرها كمان ، ورغم كده بتستورد برضه منها
من ضمنها الشيكولاته وورق الفويل وغيره !!
لو بصيت على ورق الفويل فى مصر ، هتلاقى اغلبه مصرى الصنع ! ويمكن بعض الشركات دى بتصدر بره كمان ، ولو بصيت على الشيكولاته والحلويات برضه هتلاقيها مصريه الصنع الا فى حالات معينه
احنا مثلا اكبر مصدر للشيكولاته فى الشرق الاوسط !! بس برضه بنستورد لان زى موضحتلك مينفعش اوقف الاستيراد (( بقرار حكومى ))
بس نقدر نوقفه (( بقرار شعبى )) ، ساعتها محدش يقدر يفتح بوقه !! لان الشعب هو المستهلك ، والمستهلك حر
زى ما قاطعت منتجات مصريه لمجرد انها تابعه لشركه واستثمار اجنبى ، كان الاولى تقاطع منتجات مكتوب عليها صنع فى ( دوله اجنبيه ) طالما يوجد بديل مصنع او مجمع فى مصر
يعنى لو اشتريت عربيات متجمعه فى مصر فقط ( ودول كتير حوالى 15 موديل ) ساعتها انت هتدفع الباقيين انهم يجمعوا فى مصر والا مش هيبيعوا ، وده هيوفر لينا مليارات الدولارات ، و هيضاعف المصانع الخاصه بالموضوع ده ، وهيزود الاستثمارات فى الصناعات المغذيه ، وبدل ما نقدر ننتج مثلا 45-50% من السياره محليا و منستوردوش و نوفر نص التكلفه ، لا نقدر نزود النسبه الى 60 - 100 % على الاقل فى بعض الموديلات مستقبلا!
ده تصرف محدش يقدر يدينه ، ولا يعيبه ، بل على العكس ، الكل هيحترمه ويقولوا ده شعب بيفهم ، شعب عارف مصلحته ، وعاوز مصلحة بلده ، اللى هى برضه مصلحته !!
المنتجات المصريه عادة ( مش عاوز اقول دايما ) ارخص من نظيرتها الاجنبيه المستورده ، وهنا لازم تركز فى نظيرتها ، يعنى مينفعش تقارن براند مصرى بكواليتى معينه ، مع منتجات شعبيه صينى ومضروبه ، وتقول شايف ، الصينى ارخص ؟ بلاش غباء ، وبلاش عفانه !!
حتى المنتج المصرى لو بنفس السعر او اغلى كمان ، برضه انت اللى كسبان على المدى الطويل ، لان الاستيراد بالدولار هيطربق فوق راسك انت فى الاخر برضه ، واللى وفرته بالجنيه ، هتدفعه اضعاف بعد كده من كل حاجه ، من سعر الصرف ، ومن التضخم و من قلة الاستثمارات ، مهو ليه هيجى يستثمر عند شعب اهبل بيفضل يشترى نفس المنتج بس مستورد وميحبش يشتريه لو مصنوع فى مصر !!
طالما انت بتدور على الشيكولاته البلجيكى والسويسرى ، و بتدور على العربيه المتجمعه (فى بلدها ) ، والموبايل المتجمع ( فى بلده ) ، ابقى قابلنى لو فلحنا !!! وهتفضل فاكر ان المشكله فى الحكومه ، ليه مش بتنتج لك بديل ، رغم انه متوفر بشكل او بآخر ، بس انت اللى مش مضبوط وعمال تدور على مبررات للمرقعه !!
الخلاصه اشترى المنتج اللى مر بمرحلة تصنيع فى مصر ، اسمه منتج مصرى فى الاخر ايا يكن اسم البراند !!! ده افيد ليك ميت مره على المدى الطويل!! وانت حر ، بس مترميش غلط على حد غير نفسك !!
#عبدالباسط صابر
⇧
