تصريحات ترامب عن التهجير
???? ومساء الخير
♦️تصريحات ترامب عن التهجير
????عن تصريحات ترامب
????عايز أقول لكل المصريين اوعوا تاخدوا الموضوع بشكل كوميدى .. أو تعتقدوا انها ممكن تكون سوء فهم من الصحف العالمية للتصريحات الترامبية .. تؤ .. تؤ .. ابثلوتلى ... الموضوع مقصود جداً .. وهدفه التشتيت ، وجس النبض ، واختبار رد الفعل ... حاجة كدة بالبلدى زى اللى بيعملها صياد السمك لما بيزفر المية قبل مايبتدى الصيد !
.
????تصريحات ترامب قالبة الدنيا فى الميديا العالمية وعلى السوشيال ميديا .. من أول ما طلع يمصمص شفايفه ويقولك ياعينى ياليلى على اهل قطاع غزة الغلابة بعد ماتحول القطاع لمكان لايصلح للحياة .. وانهم لازم يتنقلوا لمكان تانى لحين إعادة الاعمار اللى هيستغرق 14 سنة علشان بس يرجع لما قبل 7 اكتوبر .. يعنى ان شاء الله وألف ألف مبروك كدة على سنة 2040.
.
????وشوية يقولك يروحوا اندونيسيا وشوية يقولك ماليزيا .. ثم اطلاق تصريحات ان مصر والاردن المفروض يستضيفوا اهل القطاع ويشيلوا شوية منهم .. وإنه هيكلم جنرال سيسى فى الموضوع ده .. وطبعا كلمة (جنرال) دى مقصودة
.
????طبعا الخارجية ردت ببيان محترم ورفض قاطع للموضوع من اساسه .. قبل حتى ماحد يكلم جنرال سيسى ... ماهى مصر اصلها مش دولة بنت امبارح ... واذا كان الكلام من عندكم مش رسمى .. فاحنا نخليه من عندنا رسمى ، علشان نقصر ونجيب من الأخر ...
.
????طب نخلص كدة .. لأ طبعا .. يطلع تصريح على CNN نقلا عن ترامب ونقول إننا كلمنا الرئيس السيسى وإنه بيسعى للسلام .. وإنه هيفكر ويشوف اييه اللى ممكن يعمله .. وإنه اكيد هيساعدنى فى اللى انا باطلبه ....
.
????ولأن الموضع كدة دخل فى سكة هرتلة .. وشكلها كدة إننا بنلاعب بعض عن بعد .. ولأن الموقف المصرى معلن بشكل رسمى ومن خلال بيان رسمى .. فتعالى نلعب بقى .. فيطلع مصدر رسمى رفيع المستوى من خلال القاهرة الإخبارية ، يرد ويقول إن الاتصال ده ماحصلش من أصله !! ..
.
♦️طب ده معناه اييه !!
.
????معناه إن فيه ضغوط على مصر خلف الابواب المغلقة لقبول التهجير ..
????معناه إن اللى بيحصل ده هو محاولات لإيجاد المبرر لمصر لقبول التهجير ..
????معناه اطلاق قنابل من الدخان لعمل فرضية جدلية بهدف التشتيت وخلق حالة من الزخم .. وكمان لاستكشاف ردود الأفعال المجتمعية ، وتحديد إتجاه البوصلة الشعبية .. وخصوصاً انه معروف عن المصريين إننا شعب عاطفى .. والسوشيال ميديا والاعلام إياه بقاله اكثر من سنة ونص شغال على النقطة دى ، وتزكية فكرة المظلومية والانسانية ... وكأن مافيش حد المفروض يبقى عنده التزام انسانى تجاه غزة غير مصر !!
.
????تانى .. وتالت .. ورابع .. كل يوم بيعدى بيثبت إن الهدف من عملية 7 اكتوبر هو الوصول للنقطة دى ... نقطة التهجير ... ومش لأى مكان .. لأ .. لسيناء بالتحديد ... لأن ده هيكون مسمار جحا اللى هيتم استكمال المخطط بناء عليه !
????و ده واضح من اول يوم 8 اكتوبر لما الصحف والمواقع الإخبارية فى العالم كله اتكلمت عن التهجير لسيناء .. وكأنهم كانوا محضرين اللى هيتقال !!
.
????مصر موقفها فى النقطة دى معلن من البداية ..
من اول رفض كل الضغوط الدولية ، وقوافل الطوافين اللى جم يزوروا مصر بعد 7 اكتوبر من كل الدول والمؤسسات الدولية ، من كل المناصب .. واللى اهيف مافيهم كان رئيس وزراء .. وذلك للضغط على مصر لقبول التهجير !
.
♦️مصر موقفها معلن من البداية ..
♦️ومش هننسى لما المستشار الألماني اولاف شولتز جاء زيارة لمصر واجتمع بالرئيس السيسى فى اجتماع مغلق وطلب منه قبول التهجير .
♦️فما كان من الرئيس السيسى غير انه طلّع المستشار الالمانى على المسرح قدام العالم كله .. وأعلن فى المؤتمر الصحفى فى حضور المستشار الالمانى كل اللى دار فى الغرف المغلقة .. وصرح انه قال للمستشار الألماني إن مبدأ التهجير مرفوض حتى لو كان بشكل مؤقت لأن ده بيعرض الأمن القومى المصرى للخطر .. وإنه لو كان الأمر مؤقت .. يبقى يتنقلوا صحراء النقب لحد ما الكيان يخلص مهمته وبعدين يرجعوا تانى .. ولم يستطع المستشار الالمان الرد او حتى اعترض على اللى بيتقال امام كل كاميرات المواقع والصحف العالمية ..
.
????وطبعا الكلام ده سبقه تصريح لأسد الخارجية سامح شكرى إن اللى عايز يهجر اهل القطاع مؤقت ، ياخدهم عنده طالما مؤقت .. وإحنا هنتحمل تكاليف النقل والسفر لحد عنده !!
.
????وطبعا مافيش حد عمل حاجة .. لأن الهدف من كل ده زى ماقولنا هو التهجير لسيناء تحديدا .. مش اى مكان تانى .... مش اسوان او الاقصر حتى !
.
????عايز بس افكركم بتصريح للرئيس السيسى فى 2015 فى ذروة مواجهة الجيش المصرى للإرهاب فى سيناء .. واللى عرفنا كلنا بعد كدة كان سببه اييه ... لما الرئيس السيسى قال "سيناء ياتكون للمصريين ، يا إما إحنا نروح نموت" ... ايوة .. هى دى الخلاصة .. ومصر مش هتفرط فى سيناء ابدا
.
????الشيئ المبهر هو اصطفاف المصريين خلف القيادة .. واللى عاملينه المصريين فى كل المواقع .. وعلى كل جروبات وصفحات السوشيال ميديا .. ومرمطتهم لمراكيب واحفاد حسن الباندا ...
????بجد اللى بيحصل ده مبهر ... لدرجة ان المصريين دخلوا على كل اكونتات ترامب فى كل المنصات .. وكتبوله وسمعوه اللى ماكانش يتمنى يسمعه .. وطبعاً الكلام ده كله مرصود من كل أجهزة الاستخبارات المعادية .. وقياسات رد فعل كلها ردت فى صدرهم.
.
????طب الخلاصة .. هيحصل اييه !!
الخلاصة .. مافيش تهجير لسيناء .. و ده هيترتب عليه ضغوط على مصر .. ومعظمها ضغوط اقتصادية .. واستمرار الحملات الاليكترونية على السوشيال ميديا وحرب الشائعات .. لحد ما الموضوع يموت .. مؤقتاً !!
.
????طب (Plan B) بالنسبالهم اييه ... !!؟
????طبعاً سوريا ... اومال انت فاكرهم ركبوا الاسلامجية فى الحكم هناك لييه !؟ .. ماهو كانوا عايزين يعملوا كدة لما ركبوهم الحكم فى مصر برضوا !! .. وإلا نسينا !
????صفقة الــ 8 مليار مع الجماعة كانت حاضرة .. وسرقة ماكينات بطاقات الرقم القومى فى شمال سيناء .. وتجنيس اكثر من 30 الف بالجنسية المصرية ، وقتها .. قبل ماتتسحب منهم بعد 30 يونيو .. وتصريحات ابو الامراس اول جاسوس مدنى منتخب ، فى هذا الشأن .. لما قالك إحنا وهم واحد مافيش مشكلة .. وهنفتحلهم الحدود ييجوا عندنا.
.
????تانى ... اوعوا تاخدوا اللى بيعمله ترامب على أنها تصريحات عنجهية غير مدروسة .. لأ خالص ..
????الموضوع لعب على تقيل .. بس الشعب المصرى بجد مش سهل يتلعب معاه لما الموضوع يمس أرضه .. لأن الأرض عرض .... وكفى ...
.
❤️حفظ الله مصر برئيسها وجيشها وشعبها ????
#عبدالباسط صابر
#حفظ_الله_مصر
@إشارة
⇧
