بدأت أمريكا بخنق مصر لعدم طاعتها
???? وقت الحساب ! أمريكا تبدأ خنق مصر لرفضها بيع سيناء وتوطين أهل غزة
⭕️ خسرت قناة السويس 90 % من حركة الملاحة للى كانت بتمر بها حصرياً ، ما يوازي 64 % من إيرادات قناة السويس بحسب ارقام شهر مايو اللى فات فحسب
شكلاً دا بسبب ضربات الحوثيين في البحر الأحمر انما موضوعاً وخلف الستار دى توصية أمريكية ..
أمريكا قادرة تمحى الحوثيين من على وش الأرض بالطيران الأمريكي ومعاها الطيران البريطاني والبحرية الألمانية والفرنسية اللى بتشارك في مسرحية الإغارة على اليمن لوقف صواريخ الحوثي
حضرتك لو مقتنع ان الحوثيين هزموا أمريكا وبريطانيا وألمانيا وفرنسا يبقا سقط حقك في الاهتمام بالشان العام .. لانه دا امر لا يصدقه الجنين في بطن امه..
إنما الهدف الحقيقي هو استمرار المسرحية لتحقيق ما يحدث الآن.. تعطيل الملاحة
لخنق اقتصاد مصر.. وتفجير طريق الحرير الصيني
⭕️ انما لازم نبقا صادقين مع بعض .. مصر ينتظرها ازمة جديدة بسبب انهيار إيرادات قناة السويس.. وبسبب رغبة الغرب في معاقبة مصر .. بس قبل ما اقولك معاقبة مصر ليه؟ وازاى؟
لازم أقول انه مصر مكنش قدامها اى حل تاني ..
كان لازم نرفض كل المطالب الغربية لانه لو كنا وافقنا
يبقا مكنش هيبقا فيه مصر أصلا عشان تصمد او تصبر على محاولة العقاب..
مكنش هيبقا فيه قرار وطني ولا سيادة لمصر على ارضها وشعبها ..
كنا هنبقا مجرد عبيد وسوق في مزاد ينصبه ويديره ويربح منه النظام العالمي وبس
⭕️ مكنش المطلوب منك تنضف العريش من الإرهابيين .. وتبدا في بناء مطار العريش .. وتطور ميناء العريش لدرجة انه يلغي اى دور لموانئ إسرائيل بين قوسين فلسطين المحتلة..
⭕️ مكنش مطلوب منك خط سكة حديد بين طابا والعريش .. كان المفروض طابا تفضل فندقين سياحة وبس ..
مكنش مسموح لك تمد المياه والبنية التحتية والمشاريع الصناعية والزراعية لشبه جزيرة سيناء .. كان المفروض تسيبها صحرا لحد ما النظام الدولي يعرف يرجعها لإسرائيل من تاني.. ويخلق الظروف المناسبة لده
⭕️ مكنش مطلوب منك تطور سواحل مصر علي البحر المتوسط .. مدينة العلمين الجديدة وتطوير مدينة راس الحكمة وبناء مطار العلمين الجديدة وبدء بناء مطار راس الحكمة وميناء خليج راس الحكمة ..
⭕️ مكنش مطلوب سكة حديد من العين السخنة للعلمين الجديدة تبقى قناة سويس برية جديدة
⭕️ مكنش مطلوب شبكة السكك الحديد دي وتطوير القديمة وغيرها من الخطوط الجديدة مش لحبس السكان ولكن لان شبكات السكك الحديد دي كلها ليها استخدامات تجارية في نقل البضائع..
⭕️ مكنش المطلوب حفر قناة السويس الثانية وتطوير محور قناة السويس والمنطقة الاقتصادية لقناة السويس وتحول مشروع طريق الحرير الصيني الجديد لحقيقة على ارض الواقع وتبقا انت جاهز قبل اى دولة في مسار الطريق ويبقا فيه خط ملاحة تجارية بنجاح والسرعة دي من غرب الصين لقناة السويس المصرية..
⭕️ مكنش مطلوب ترجع لتوشكى وتنجح المشروع ولا تعمل مشروع الدلتا الجديدة ولا تعرف تحكم قبضتك على مصادر ثرواتك الطبيعية في مياه شرق المتوسط..
⭕️ مكنش مسموح تطهر سيناء من الإرهاب وقبل سيناء دخلت ليبيا ونضفت شرق ليبيا من منتخب إرهاب العالم وقضيت على مشاريع الجيش المصري الحر وتنظيم الدولة في مصر وليبيا
⭕️ كان المطلوب منك تسقط في فخ ارسال القوات المسلحة الى سوريا واليمن وليبيا والسودان وإثيوبيا..
⭕️ كان المطلوب جبهة داخلية ضعيفة تثور على الرئيس عبد الفتاح السيسي وتسقط مؤسسات الدولة في الأيام الاولي من عملية طوفان الأقصى..
⭕️ كان المطلوب دولة ضعيفة مترسمش خطوط حمراء وتقف تتفرج علي جحافل الغزاويين وهما بيقتحموا الحدود المصرية الفلسطينية للمرة التانية والأخيرة والمرة دي بلا رجعة وبلا عودة..
⭕️ كان المطلوب تسيب جيشك ضعيف قديم بلا تطوير بقدرات محدودة في كل شيئ
⭕️ كان المطلوب لما يتقال لك هنصفر ديونك وتاخد فوقهم 50 مليار دولار مقابل توطين اتنين ونص مليون فلسطيني هم كل سكان قطاع غزة انك تتواطأ فعلا وتعمل نفسك مش عارف تصدهم ويدخلوا سيناء وتبقا بتاعتهم للابد وخد انت القرشينات وشوف نفسك بقا وكفاية شعارات القضية الفلسطينية
⭕️ مكنش مسموح لك تطور الموانئ في السخنة وبورسعيد والسويس بالشكل دا وتحسم حرب الموانئ مع دول الجوار قبل ما تبقا حسمتها مع اباطرة النظام العالمي..
⭕️ مكنش مسموح لك تطور علاقات دولية مع أوروبا وروسيا والصين بالتوازي مع بريطانيا وامريكا وتسقط نظرية ماما أمريكا من حسابات مصر الدولية
⭕️ مكنش مسموح لك تاخد قروض من صندوق النقد والبنك الدولي وفعلا تعمل بيها مشاريع كان المطلوب تروح تاكل وتدفع مرتبات ودعم بيها واخر كل سنة متلاقيش عندك اى مشاريع تجيب لك إيرادات ف تبدا تبيع في قرارك الوطني وسيادة الدولة على أراضيها والنهاردة سيناء وبكرا الاهرامات وبعده قناة السويس وهلم جرا
⭕️ كان المفروض لما الغرب يقول صفقة القرن تقول آمين،، لما الغرب يقول ناتو عربي يحارب ايران ونصنع فتنة سنية شيعية تهدم الإسلام للابد نقول آمين
لما الغرب يقول ممر هندي صهيوخليجي امريكي تبقا مصر اول من يهرول ويطالب بالاشتراك والحاق قناة السويس بالممر الجديد ونقول آمين
⭕️ لما يتقال لنا بلاش ننضم لروسيا والصين في بريكس نقول آمين
⭕️ لما يتقالك مالكمش دعوة بالفوضى الخلاقة في السودان وليبيا ولا دفاع او دعم للدولة الوطنية هناك تقول آمين
⭕️ لما تحصل اتفاقية بين اثيوبيا وإقليم متمرد في الصومال اوعا تستقبل رئيس الصومال وتسقط الاتفاق زي ما حصل لما فعلنا اتفاقية الدفاع المشترك
⭕️ مكنش مطلوب منك اتفاقية الشام الجديد مع العراق والأردن وانك ترجع العراق لمحيطه العربي مرة تانية ويصبح الرئيس السيسي هو اول رئيس مصري يزور العراق من سنة 1990
⭕️ كان المطلوب مع كل زيادة في سعر الدولار قدام الجنيه يحصل انتفاضة جياع ومؤامرة يناير 1977 تتكرر تاني .. تتكرر مرة كل سنة ونبقا جمهورية موز عندك رئيس انتقالي كل سنة وتضيع هيبة الدولة وهيبة مقام رئيس الجمهورية وتبقا القوات المسلحة مشغولة طول السنة في ترتيب الجبهة الداخلية ما يسهل للغرب التلاعب والعبث بالشرق الأوسط من البحرين للجزائر..
⭕️ كان المطلوب لما تحصل اتفاقية دبي حيفا تبقا موانئ مصر خارج الخدمة مش تشتغل وتهزم الاتفاق في مهده عملياً
⭕️ كان المطلوب لما الغرب يقترح طريق راس الرجاء الصالح انه قناة السويس تبقا قديمة وغير صالحة وبالتالي راس الرجاء الصالح يبقا طريق مودرن وعصري جنب قناة السويس وليس العكس
⭕️ كان المطلوب لما يتم نشر قوات دولية في شرق المتوسط انه ميبقاش فيه اسطول مصر الشمالي وابار الغاز بتاعتك تروح في مقلب حرامية بين إسرائيل وحزب الله في عرض البحر ولا حتى حسن نصر الله ينفذ تهديده اللى قاله من 48 ساعة بمعاقبة قبرص وتلاقي المنطقة دي كلها ولعت وانت مش عارف تلاقي حقك فيها..
⭕️ كان المطلوب عسكرة البحر الأحمر وتدويل مضيق باب المندب واحتلال خليج عدن وانت ساكت..
⭕️ كان المطلوب تقفل معبر رفح نهائي ولا يفتح الا للأجانب اللى خارجين من غزة وبس
⭕️ كان المطلوب انك متقدرش تعول 10 مليون لاجئ على ارضك وتتوسل مساعدات دولية زي دول تانية مش مناسب دلوقتي نجيب سيرتها بس منصبين نفسهم محور ممانعة ومقاومة على الفاضي..
⭕️ والعقاب بدأ .. مقلب حرامية في عرض البحر بين الحوثيين والغرب عشان يتقفل البحر الأحمر وقناة السويس..
حرب لبنان هتأثر على تدفق الاستثمارات الأجنبية والسياحة للشرق الأوسط واولهم مصر..
⭕️ ارتفاع درجات الحرارة عالميا وبكرر عالميا مش في مصر بس هيؤدى الى ندرة في المحاصيل الزراعية حول العالم ..
مشترياتك من القمح والحبوب عموما هتقل .. ومكنش مسموح لك تستصلح تلاتة مليون فدان ولا توشكى ولا الدلتا الجديدة ولا صوب زراعية ولا نهر صناعي في الصحرا ولا أكبر محطات لتحلية ومعالجة المياة في العالم..
⭕️ ايوا المشاريع اللى انت كنت متسرح تسخر منها وخط الجمبري وخط السوبيط .. للأسف اللى بيسخر مش فاهم كارثة ان امة تعدادها فوق ال 120 مليون وتبقا امة جياع ..
مش فاهم ان غرض العدو اننا ناكل في بعض حرفياً مش مجازاً وان الامن القومي الغذائي والزراعى دا مسئولية الجيوش في كل دول العالم..
الفترة الجاية مش سهلة زي ما بعض الهواة والخفاف ما بيقولوا لك .. للأسف اللى جاى صعب .. مش اصعب من اللى فات ولكنه صعب .. مش اصعب من اللى فات لانه احنا كنا مستعدين له رغم كرنفالات السخرية والتطاول وقلة الرباية اللى بينصبها ناس هم اول المستفيدين من نعيم وخيرات المشاريع القومية دي
⭕️ واحد يسألني طيب هو ايه المطلوب .. أقوله حرس سلاح .. العدو على الأبواب والمؤامرة مستمرة .. والعالم داخل على حرب عالمية ثالثة مباشرة مش باردة ولا إقليمية زي ما بيحصل في أوكرانيا ولا هيحصل في تايوان ولبنان ..
وحرب السياسة والايدولوجيات بين اليمين القومي والعولمة في أوروبا وامريكا ..
الحل والمطلوب هو التمسك بالوطن بالبلد والجيش والوقوف خلف القيادة السياسية وبلاش نتحول لقنابل دخان تشتت انتباه صاحب القرار السياسي والسيادي في هذا التوقيت
احنا في توقيت اصعب من اى مرحلة فاتت على مصر لا تقولي 1840 و لا 1973 بس الفارق اننا معانا ارضنا ومقدراتنا وثرواتنا البشرية والطبيعية انما المؤامرة لتطويق مصر النهاردة اشرس بكتير من اللى مرت به مصر في سنوات محمد علي او جمال عبدالناصر أو أنور السادات..
⭕️ نحترم الخير اللى في أيدينا ولا نهدره ..
نصبر ونفهم ان العالم اجمع بيمر بمشاكل اقتصادية وبيئية من ابشع ما يكون ..
يبقا العالم بيمر بتغيرات مناخية واحتباس حراري وغليان عالمي وانت عبيط ماشي ورا لجان تقولك ارتفاع درجة الحرارة بسبب شجرتين في مصر الجديدة ..
يبقا العالم بيمر باغلاق عالمي ووباء من سنة 2020 ثم ركود عالمي وتضخم دولي وحرب أوكرانيا والعقوبات الغربية على روسيا وهستيريا رفع الفيدرالي الأمريكي للفائدة وأزمة انهيار البنوك الامريكية وسوق الأسهم في سويسرا وسوق العملات الرقمية وكل دا اثر في العالم اجمع أمريكا والصين وأوروبا قبل الدول النامية وانت بتصدق اللى يقولك المونوريل والعاصمة الإدارية ومدبولي هما السبب
⭕️ الحل انك تفوق من ماتركس الأكاذيب والسذاجة وشغل المراهقة السياسة وسنة أولى سياسة ونبقا على اد الكارثة اللى بيمر بها العالم بدل ما نبقا شوية غلمان وجواري وعبيد في سوق السياسة لو غابت عنا الحقائق دي ومشينا ورا الخطاب اللى يقولك الحوثيين جدعان وحماس انتصرت وواحد اتنين الجيش المصري فين
الجيش المصري في كل بيت مصري راعي امنك وغذائك ووقودك ومصيرك ولا فيه جيش واحد على وجه الأرض حامي بلده زي ما الجيش المصري حامي مصر
حفظ الله مصر من كل سوء
وجعلها كما تستحق امة عظمي بين الامم
⇧
